Oct 27, 2011

အလွယ်ဆုံး

            “ခက်” တာကို လူတိုင်းမနှစ်သက်ကြသလို “လွယ်” တာကို အားလုံး နှစ်သက်လက်ခံကြတယ်။ လတ်တလောအခက်အခဲ၊ ပြသနာ ဖြေရှင်းဘို့ကိုလည်း “အလွယ်” လမ်းကိုသာ သာမန်ရွေးကြမှာပါ။
             အသက်ရှင်နေသည့် ဘ၀ တလျှောက်လုံး နေ့စဉ် လူတိုင်း တွေ့နေရတဲ့ ခံစားချက်တွေဟာ
ကိုယ် “နှစ်သက်လက်ခံ” နိုင်တာနှင့် “မနှစ်သက် လက်မခံ” မှုနှစ်ခုပေါ်မှာသာ မူတည်နေပါတယ်။ ဒီတော့
“လွယ်” တာကို အများစုက “နှစ်သက်လက်ခံ” နိုင်ပြီး “ခက်” တာကို “မနှစ်သက်လက်မခံ” ဘူးလို့ ကျွန်
တော်တို့ ပြောနိုင်ကြပြီပေါ့။
             “အလွယ်ဆုံး” လုပ်ရပ်တိုင်းဟာ ရေရှည်မှာ “အခက်ဆုံး” ဖြစ်လာမယ်လို့ ကြိုပြောရင် “ကိုယ်
တွေ့” မဖြစ်သရွေ့ လက်ခံဘို့သိပ်ခက်ပါတယ်။ လူ့သဘာဝအရ “ကိုယ်တွေ့” ဘယ်လောက်ကြုံခဲ့ပြီး
သော်လည်း “လွယ်” တာကို ဆက်နှစ်သက်နေကြစမြဲပါ။ လွယ်လွယ်လေး လုပ်လိုက်လို့ လက်တလော
ပြသနာ ရှင်းသွားတယ်၊ ဖြတ်လမ်းလိုက်မိလို့ အချိန်ကုန်သက်သာသွားပြီး အဆင်ပြေ စိတ်ချမ်းသာသလို
ခံစားရပေမယ့် နောက်ဆက်တွဲ “အခက်ဆုံး” တွေနှင့် ဆုံရအုံးမယ်လို့တွက်မိသူ တော်တော်ရှားလိမ့်မယ်။
ကံဆုံ၍ ပထမအကြိမ်မှာ “ဖြတ်လမ်းနှင့်အလွယ်လိုက်” လမ်း ကပြသနာအခက်ကို ရှင်းလိုက်နိုင်ပေမယ့်
“အလွယ်လိုက်” လုပ်ရပ် အကျင့်ဆိုးကြီးက အမြစ်တွယ်သွားလို့ နောက်လုပ်ရပ် တွေမှာ ဒီနည်းကိုဘဲအား
ကိုးမှာမို့ မအောင်မြင်တဲ့ လမ်းမကြီးပေါ်ရောက်လာပြီလို့ တွက်လိုက်ပါ။
              ဘယ်လိုကိစ္စကို အလွယ်ဆုံးလို့သတ်မှတ်ကြမလဲ။ တစ်ယောက်အတွက် “အလွယ်ဆုံး” လုပ်ရပ်
ဟာ နောက်တစ်ယောက်အတွက် “အခက်ဆုံး” လည်းဖြစ်နိုင်ပါတယ်။ တစ်ဦးချင်း၏ စွမ်းရည်၊ ခံစားချက်၊
အခြေအနေပေါ်မူတည်ပါတယ်။
              ဒါပေမယ့် လူသားအားလုံး ညီမျှစွာ လက်ခံနိုင်လောက်သည့် “အလွယ်ဆုံး” ကိစ္စတခုရှိပါသည်။
၎င်းကိစ္စဖြစ်မြောက်ရန်မှာ ကြိုးစားပြီးအရင်းအနှီး ရှာစရာလည်းမလို၊ ဘာအတားအဆီးမှမရှိ၊ ဆန့်ကျင်မှု
ဘယ်တော့မှလည်း မလုပ်၊ ကိုယ့်စိတ်ဆန္ဒအတိုင်း စိတ်ကြိုက် အမြဲလိုက်လျောပြီး၊ စိတ်ကူးလိုက်တာနှင့် အ
ချိန်အရလည်း စောင့်စရာမလို ချက်ချင်းအကောင်အထည်ဖော်ရသည့် “အလွယ်ဆုံး” ကိစ္စ ကတော့နှုတ်ခမ်း
နှစ်ခုကြားကနေ ဘာမှ မစဉ်းစား၊ မထောက်ညှာဘဲ ထွက်သွားသည့် “အလွယ်ဆုံး” သုံးမိသည့် “စကား” လုံး
များပင်ဖြစ်ပါသည်။ လွယ်လွန်း၍ လူတိုင်းနေ့စဉ် ကျူးလွန်ကြုံတွေ့နေရသည့် “အမှား” များနှင့် တိုက်ရိုက်
ဆက်နွယ်နေပါသည်။
               ဖတ်သားဘူးသော စာစောင်တွေက အနှစ်သက်ဆုံး မှတ်ထားမိသည့် စာတန်းတချို့ကိုပြန်ရေး
ပြရလျှင်၊
- အသံကြောင့် ဖားသေ။
- စကားကျွံလျှင် နှုမရပါ။
- စကားများလျှင် အမှားများသည်။

Talk low, talk slow but don't talk too much.
(တိုးတိုးပြောပါ၊ ဖြေးဖြေးပြောပါ။ ဒါပေမယ့် စကားများများ မပြောနှင့်။)

A word slip from your mouth is no further belongs to you and also 50% of your secrecy is lost.
(နှုတ်မှ ထွက်ပြီးသောစကားလုံးကို သင်မပိုင်ဆိုင်တော့ပါ။ ကိုယ်ပိုင်လုံခြုံမှု၏ ၅၀% လည်းလျော့သွားပြီ။)

Mouth is the biggest opening in this world. It appreciates and criticises at the same time.
Least opening of your mouth is the best.
(ပါးစပ် သည်ဤကမ္ဘာတွင်အကြီးဆုံး အပေါက်ဖြစ်သည်။ ၎င်းအပေါက်မှပင် ချီးမွမ်း၊ ရှုံ့ချမှု နှစ်မျိုးစလုံးကို
တချိန်တည်း လုပ်နိုင်စွမ်းရှိသည်။ ပါးစပ်ကို “ဖွင့်ဟမှု” အနည်းဆုံးဖြစ်နိုင်အောင်လုပ်လျှင် အကောင်းဆုံးဖြစ်
သည်။)

As you go through life, you are going to have many opportunities to keep your Mouth shut.
Take advantage of all of them.
(သင့် ဘ၀ တလျှောက်မှာ နှုတ်ကို ပိတ်ထားနိုင်သည့် အခွင့်အကောင်းများနှင့် ကြုံရလိမ့်မည်။ ဒီအခွင့် အ
ရေးကို ယူ၍အသုံးချပါ။)

The reason dogs have so many friends is because they wag their tails but not their tongues
like human beings.
(ခွေးသတ္တ၀ါများ ချစ်စရာမိတ်ကောင်းများရရန် “အမြီးရမ်း” ၏။ လူသားများလို “လျှာ” မရမ်းပါ။)

             “စကားလေးတလုံး” ကြောင့် ဘ၀အခြေအနေ ပြောင်းသွားရတဲ့ သာဓကတွေ တပုံကြီးရှိပါတယ်။
ကောင်းကျိုးထက်၊ ဆိုးကျိုးပိုရတာများပါတယ်။ ကိုယ်ပြောတဲ့ စကားကြောင့် ကိုယ့်မှာ ဆိုးကျိုး၊ ကောင်းကျိုး
ပြောင်းလဲမှုတွေ ယခုဆောင်းပါး ဖတ်နေသော သူမှာပင်ရှိခဲ့ဘူးမှာပါ။ ဒါကြောင့် စကားမပြောခင်မှာ သေချာ
စီစစ်ဖို့ လိုတယ်။
              အောင်မြင်တိုးတက်ကြီးပွားနေသူတိုင်းဟာ စကားကို သိပ်သတိထားပြောတယ်။ ဘာကိုမှ လွယ်
လွယ်လေးနှင့် မ  ပြောပါ။ မပြောခင်မှာ အထပ်ထပ် စဉ်းစားပြီးမှပြောသလို သူ့ကိုပြောတဲ့ စကားကိုလည်း
တလေးတစား တန်ဖိုးထားပြီးတိုင်းတာ ဝေဖန်တယ်။ တပါးသူရဲ့ အတွင်းစာရိတ္တကို သိဖို့ရန် အ၀တ်အစား၊
အနေအထိုင်ထက် သူပြောတဲ့ စကားပေါ်မှာ ပိုပြီးပုံဖမ်းလို့ရတယ်။ နားထောင်နေတဲ့သူရဲ့ အတွေ့အကြုံ၊
အသိဥာဏ် အတိမ်အနက်ပေါ်မှာ မူတည်ပြီး ပြောနေသူရဲ့ အခြေအနေကို ချက်ချင်းမှန်းနိုင်ပါတယ်။ ပြော
သူက “မဟုတ်တာ” ကိုယုတ္တိရှိအောင် သရုပ်ဆောင်ပြီး၊ အပြောသိပ်ကောင်းလို့ ယုံမိတယ်ထားအုံး၊ ပြော
ထားခဲ့တဲ့ စကားလက်ကျန် သက်သေ ရှိနေသေးလို့ အဖြစ်မှန်ကို ရေရှည်ဖုံးမရပါ။ ဒါကြောင့် ပြောမိလိုက်
တဲ့ စကားလုံးတိုင်းရဲ့ ထိရောက်မှု အတိမ်အနက်က တိုင်းမရအောင် ကျယ်ပြန့်လွန်းပါတယ်။
               အမှတ်မထင် လွယ်လွယ်လေး စကားပြောမိတယ်။ ဒေါသအလျှောက် စကားတွေ အန်ထွက်
တယ်၊ လောဘအရ ကတိစကားတွေ လွယ်လွယ်လေး ပေးကြတယ်။ ပြောတဲ့သူအနေနှင့် ခံစားချက်မရှိ
စိတ်မှာ ပေါ်လာတဲ့ လှုပ်ရှားမှု ဆန္ဒအရလွယ်လွယ်လေး ပြောလိုက်ပေမယ်၊ ပြောသူကို ပတ်ဝန်းကျင်တခု
လုံးက သူ့သုံးစွဲခဲ့သမျှ စကားများနှင့် ညီမျှသည့် တုန့်ပြန်မှုတွေနှင့် တိုင်းထွာဝေဖန် အကဲဖြတ်ကြမယ်။
ပြောသူ၏ အတွင်းစာရိတ္တတစ်ခုလုံးက သူပြောဆိုသုံးနှုန်းသမျှ သူ့စကားများမှာ ပုံပေါ်နေပါသည်။
              အဝေဖန်လွန်ကဲခြင်း၊ ပြစ်တင်ရှုံ့ချခြင်း၊ ပေးထားသောကတိကို ရုပ်သိမ်းခြင်း၊ စကား အပြောင်း
အလွဲလုပ်ခြင်း၊ အကြွားအ၀ါလွန်ကဲခြင်း၊ သူတပါးကိုနှိမ့်ချ အထင်သေးစကားပြောခြင်းများသည် ပြောဆိုသူ
၏အတွင်း စိတ်ရင်းနှင့် ထပ်တူနေပါကြောင်းဖော်ပြနေပါသည်။
              ကျွန်တော် ကျေးဇူးရှင် တစ်ယောက်ဆုံးမဖူးသည်။ “ဆန္ဒပေါ်လာတာကို နှုတ်ကနေ ချက်ချင်းမ
ပြောဘဲ ဦးနှောက်ဥာဏ်ဖြင့် အရင်ဆုံးစီစစ်ပါ။ ဖြစ်နိုင်လျှင်သုံးကြိမ်လောက် စိတ်အေးအေး အချိန်မှာ စီစစ်
ပြီးမှ ပြောသင့် မသင့်ကို ဆုံးဖြတ်ပါ။ နားထောင်သူနှင့်လည်းမဆိုင်၊အကျိုးလည်းမရှိ၊ တပါးသူအတွက်နစ်နာ
မှုလည်း ရှိပြီး၊ သူမနှစ်မြို့စရာကိစ္စ” ဖြစ်နေလျှင် နှုတ်ကိုပိတ်ထားပါ။

                                    ဖိုးဝမောင်(အော်စလိုမြို့) မှ ကူးယူဖော်ပြအပ်ပါတယ်ခင်ဗျာ..............။


 

No comments:

Post a Comment